شوقٌ وحنينٌ

زجل /صلاح الخدَّاش

*************************
لا تستعجلْ يا بابا وبنستنَّاكْ
لا تتأخرْ علينا الله معاكْ
بابا اطَّلع ْ قدَّامكْ مشْ لوراكْ
خليكْ توْصلْ لعنَّا بالسَّلاماتْ
*****************
طولتِ الغيبةْ عْلينا وطال الغيابْ
طول العمرْ نستنَّى تدُّق البابْ
يا ربِّ السَّما العالي تلمِّ الاحبابْ
وننسى الماضي وأحزانهْ وكلِّ الآهاتْ
*********************
تسألْ عنَّك تينتنا وزيتوتنا
والعنبةْ الشَّلبيِّة حلفتنا
قولوا للغايب عاودْ والله اشتقنا
يلقِّطْ تين وزيتون ويسقي الورداتْ
********************
إخواني بدي أحكي عن أحوالي
شاعر بدو يسلِّيكم هُو نبالي
بيت نبالا الحبيبة عزِّي ومالي
العودة إلها قريبة بعد الشَّتاتْ
******************
لا تلوموني يا حبابي قلبي حزينْ
بدي أرجع لبلادي لا للتَّوطينْ
مال الدُّنيا ما يعادل أرضِ فلسطينْ
بدها فلسطينُ منَّا صمود وثباتْ
*******************
بدي أرسل لاخواني هالتَّحيَّةْ
تحيَّاتي معطَّرة ونبليَّة
حيَّا الله ملتقانا والأهليَّة
بدنا نرجعْ سويّة للبيَّاراتْ
*******************
نحصدْ قمح ْ وشعيرْ وسمسمْ بالذَّات
ونعصرْ زيتونْ نبالي ونملا الجرَّاتْ
ونحيي الدَّبكة والصَّحجة بكلِّ السَّاحاتْ
وفيك ِ يا بيتْ نبالا تحلى السَّهراتْ
وفيك ِ يا بيتْ نبالا تحلى السَّهراتْ
وفيك ِ يا بيتْ نبالا تحلى السَّهراتْ
**********************

 

21\4\2009م